(၇၇)နေင်ႏခွပ် ပအိုဝ်ႏမွူးနီꩻခွိုꩻပအိုဝ်ႏအတာႏ မာꩻလွေꩻပထမခီႏ ပွယ်ꩻအုံကွံ

ဇန်နဝါရီ (၇)နီꩻ၊ ၂၀၂၆
အထူꩻဒေႏသ(၆)၊ ဝေင်ꩻတောင်ႏကီꩻ၊ ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏ ဒဲဥ်သီႏဗွေကွင်ꩻ၊ ဟော်တန်ကို (၇၇)နေင်ႏခွပ် ပအိုဝ်ႏမွူးနီꩻခွိုꩻပအိုဝ်ႏအတာႏ မာꩻလွေꩻပွယ်ꩻအုံကွံ အကျောင်ꩻသေထွꩻဗာႏသွူ။
အရီးသွတ်ꩻ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻဥက္ကဌ ဖြားခွန်ဝင်းကို ဒေါ့ꩻဖေႏ ပွယ်ꩻအုံကွံအဗွောင်ငေါဝ်းငွါနောဝ်ꩻသွူ။
မွူးနီꩻခွိုꩻပအိုဝ်ႏယိုနောဝ်ꩻရေႏမိုးလွေꩻဒျာႏ ပအိုဝ်ႏလွောင်ႏဗူႏရေꩻ၊ ခွိုꩻရက်သꩻဖေႏကအောဝ်ႏတသေႏသေႏ၊ ပအိုဝ်ႏစွိုးခွိုꩻလိုꩻမျိုꩻယို ဖေႏကတင်ႏသျာꩻတသေႏသေႏတဲင် ဖြွမ်ႏဖြွမ်ႏဗူႏဗူႏ ၊ ဟန်ႏနေင်ႏ ကွိုန်ꩻကွိုန်ꩻဟွိုင်ꩻဟွိုင်ꩻ မွူးနီꩻခွိုꩻပအိုဝ်ႏ(၇၇)နေင်ႏခွပ်ယို အွဥ်ဝင်ꩻသောင်ႏသာသွော့ဝင်ꩻအကျောင်ꩻ၊ မွူးနီꩻခွိုꩻပအိုဝ်ႏယို ယံယံကျကျ တဲပ်တဲပ်တောႏတောႏ ဖေႏကအောဝ်ႏအတာႏ ကလွောင်ႏဗူႏလဲဥ်းဒါႏ ကောႏမတီႏဖုံႏတဲ့ တာႏဝွန်ႏကေႏကေႏ ထေင်းထမ်ႏသွော့ဝင်ꩻအကျောင်ꩻ ပအိုဝ်ႏစွိုးခွိုꩻယေန်ႏငဲရေꩻအစွိုꩻ(ဗဟိုႏ)ဥက္ကဌ ဖြားခွန်ဝင်းကို ဒေါ့ꩻလွေꩻဖေႏ အဗွောင်ငေါဝ်းငွါနုဲင်းနောဝ်ꩻသွူ။

အောဝ်ႏနောဝ်ꩻထွူ ပအိုဝ်ႏစွိုးခွိုꩻအစွိုꩻ(PNO)ပါတီ အွဥ်အကိုရေꩻချုပ် ဖြားခွန်သိန်းဖေ ဒေါ့ꩻလွေꩻဖေႏ ငေါဝ်းဖေႏအာႏတမာနောဝ်ꩻသွူ
မွူးခွိုꩻပအိုဝ်ႏယိုနောဝ်ꩻ ထွာဒျာႏတစွိုးတခွိုꩻလွုမ်းအရေꩻဒျာႏအကျောင်ꩻ ပအိုဝ်ႏလွောင်ႏဗူႏရေꩻယို ခမ်းကိုခမ်းထန်ႏ လိုꩻမျိုꩻအလောင်ႏလင်ꩻဖုံႏ အောဝ်ႏခဥ်ႏထွား မွူးနီꩻခွိုꩻပအိုဝ်ႏယိုအကျောင်ꩻ ဟန်ႏနေင်ႏ မွူးနီꩻခွိုꩻပအိုဝ်ႏယိုနောဝ်ꩻ ပအိုဝ်ႏအတာႏ အရေꩻတန်မွေးငါႏအကျောင်ꩻ၊ ယိုမာꩻငါနောဝ်ꩻ ခမ်းထီနဲင်ႏငံႏရေꩻ အီႏငိမ်ꩻစွူတငါသွူတဲင် ပြွူႏဖြိုꩻရေꩻထာꩻမာꩻဖုံႏယို လွိုက်ရွေꩻပွယ်ꩻမဥ်ႏထွူ အီႏကျိုꩻစာꩻဗာႏယင်းသွူ အီႏမာꩻလွေꩻသွူ တယ်ႏဆို့ꩻရေꩻအကျောင်ꩻ၊ ကွပ်နောဝ်ꩻမꩻ ခွိုꩻနွယ်ႏပအိုဝ်ႏ ကားကအောဝ်ႏ (၇၇)နေင်ႏခွပ် မွူးနီꩻခွိုꩻပအိုဝ်ႏယိုနောဝ်ꩻ နေးတွမ်ႏသꩻရက်စွိုးခွိုꩻသꩻရက်လိုꩻမျိုꩻတဲင် လွောင်ႏလွောင်ႏဗူႏဗူႏ တဲပ်တဲပ်တောႏတောႏ ပအိုဝ်ႏလိုꩻမျိုꩻယို ဖေႏကထဲ့ꩻဖွိုႏဗာႏမွိုန်းအတာႏ ကျိုꩻစာꩻသောင်ႏသာသွော့ဝင်ꩻအကျောင်ꩻ ပအိုဝ်ႏစွိုးခွိုꩻအစွိုꩻ(PNO)ပါတီ အွဥ်အကိုရေꩻချုပ် ဖြားခွန်သိန်းဖေ ဒေါ့ꩻဖေႏအာႏ တမာနုဲင်းနောဝ်ꩻသွူ။
အောဝ်ႏနောဝ်ꩻထွူ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ(ဗဟိုႏ) အွဥ်အကိုရေꩻ ခွန်စင်ဟန် ဒင်ႏသွင်ꩻလွေꩻ ပွယ်ꩻတန်ထွာထင်ႏရေꩻဗဟိုႏကောႏမတီႏထာꩻမာꩻအမုဆောင်ႏကောႏမတီႏ နောဝ်ꩻထွူ ကထင်ႏလွဥ်ဒါႏ ပွယ်ꩻအုံကွံ ဝေင်ꩻနယ်ႏပေါင်ꩻစွုမ်ႏပုဂ္ဂိုလ်ႏ ဒေါ့ꩻလွေꩻဖေႏ (၇၇)နေင်ႏခွပ် မွူးနီꩻခွိုꩻပအိုဝ်ႏအတာႏ ငေါဝ်းအကျံႏဉာဏ်ႏဖုံႏထွူ တွိုင်ႏပင်ႏအုံမွန်းလွေꩻယင်း ကိစ္စအစွိုးစွိုးအဒေါဝ်ႏဒေါဝ်ႏထွူ အခြပ်အရဲဥ်ႏသား ဒင်ႏပျꩻနယ်ချာ ပွယ်ꩻမော့ꩻခွဲ အွဥ်ႏထွော့ချက်ဖုံႏထွူတဲင် ထူႏသိမ်ꩻချာꩻ အခမ်ꩻအနာꩻအကျောင်ꩻသေထွꩻဗာႏသွူ။
(၇၇)နေင်ႏခွပ် မွူးနီꩻခွိုꩻပအိုဝ်ႏကွိုန်ꩻကွိုန်ꩻဟွိုင်ꩻဟွိုင်ꩻ ယံအောင်ႏမျင်ႏနွောင်ꩻရေꩻအတာႏ ပအိုဝ်ႏစွိုးခွိုꩻအစွိုꩻ(PNO)ပါတီအွဥ်အကိုရေꩻချုပ် ဖြားခွန်သိန်းဖေ၊ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻ(ဗဟိုႏ)ဥက္ကဌ ဖြားခွန်ဝင်းကို တွမ်ႏ ဝေင်ꩻနယ်ႏပေါင်ꩻစွုမ်ႏပုဂ္ဂိုလ်ႏသီး ကျွꩻထင်ႏလွဥ်ဝင်ꩻ (၁၅၀)ဖြာꩻအကျောင်ꩻ သေထွꩻဗာႏနောဝ်ꩻသွူ။
Email – niyomedia839@gmail.com
#နီယိုသတင်းဌာန
#niyomedia
Tiktok- https://www.tiktok.com/@niyomedia01?is_from_webapp=1…
website – https://blackkaung.xyz/
Telegram – https://t.me/niyomedia
YouTube – https://www.youtube.com/@niyomedia14