ပအိုဝ်ႏစွိုးခွိုꩻအစွိုꩻ(PNO) နေင်ႏ(၅၀)ဗွေ အထိန်ꩻအမုဲင်တွမ်ႏ အထူꩻဒေႏသ(၆) ပအိုဝ်ႏစွိုးခွိုꩻအစွိုꩻ ငိမ်ꩻချံꩻရေꩻ(၃၅)နေင်ႏဗွေ အထိန်ꩻအမုဲင် ပွယ်ꩻထူႏဂွုဏ်ႏအတာႏ မာꩻလွေꩻပွယ်အုံကွံ

မတ်လာ ၄ နီꩻ၊ ၂၀၂၆
ဝေင်ꩻတောင်ႏကီꩻ၊ ကန်ႏတန်ရပ်ကွက်၊ ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏ လွိုင်ႏကွိုန်ꩻသာႏယာႏရေꩻအဖဲ့ꩻပေါင်ꩻစွုမ်ႏ (ဒဲဥ်သီႏဗွေ)ကွင်ꩻကို ဟန်ႏနီꩻ မတ်လာ ၄ နီꩻ ဒဲဥ်သီႏလာလောင်း ၂နီꩻ မွူးရဝ်ꩻခိုႏ (၉း၃၀)အခိန်ႏ ပအိုဝ်ႏစွိုးခွိုꩻအစွိုꩻ(PNO) နေင်ႏ(၅၀)ဗွေ အထိန်ꩻအမုဲင်တွမ်ႏ အထူꩻဒေႏသ(၆) ပအိုဝ်ႏစွိုးခွိုꩻအစွိုꩻ ငိမ်ꩻချံꩻရေꩻ(၃၅)နေင်ႏဗွေ အထိန်ꩻအမုဲင် ပွယ်ꩻထူႏဂွုဏ်ႏအတာႏ ပွယ်ꩻထွာနွောင်ꩻရေꩻ အွဥ်ငါကောႏမတီႏ၊ ထာꩻမာꩻကောႏမတီႏတွမ်ႏ ဆပ်ကောႏမတီႏစွိုꩻ ခြိꩻထူႏ မာꩻလွေꩻပွယ်အုံကွံ နောဝ်ꩻသွူ။

ပွယ်အုံကွံကို ရီးသွတ်ꩻ ခံႏနွမ်ꩻလွေꩻ စွိုးခွိုꩻအလံႏတောႏထွူ ပွယ်ꩻထွာနွောင်ꩻရေꩻအွဥ်ငါကောႏမတီႏ နာယကတန် ဖြားတန်ခွန်စံလွင် နဝ်ꩻ ဒေါ့ꩻလွေꩻဖေႏ အဗွောင်ငေါဝ်းငွါထွူ၊ ပွယ်ꩻထွာနွောင်ꩻရေꩻအွဥ်ငါကောႏမတီႏ အွဥ်အကိုရေꩻချွုတ် ဖြားခွန်သိန်းဖေ နဝ်ꩻ ဒေါ့ꩻခြုဲင်းနယ်လွေꩻဖေႏ ကဖစ်ဟဲ့ꩻဗာႏဒါႏ ပွယ်ꩻအုံကွံအကျောင်ꩻခရာႏနဝ်ꩻသွူ။

နောဝ်ꩻထွူ ပွယ်ꩻထွာနွောင်ꩻရေꩻထာꩻမာꩻကောႏမတီႏ အွဥ်အကိုရေꩻစွိုꩻ အွဥ်ငါဆွေနွေꩻ ဒင်ႏပျꩻနယ်လွေꩻ ကောႏမတီႏအရန်းရန်း တာႏဝွန်ႏတွမ်ႏ ဝတ္တရာꩻဖုံႏထွူတဲင် အုံကွံဆွေꩻနွေꩻလွေꩻဝင်ꩻ အစွိုးစွိုးအဒေါဝ်ႏဒေါဝ်ႏ အွဥ်ႏထွော့လွေꩻ ပွယ်ꩻအုံကွံ အွဥ်ႏထွော့ချက်ထွူ ပွယ်ꩻထွာနွောင်ꩻရေꩻအွဥ်ငါကောႏမတီႏ နာယကတန် ဖြားတန်ခွန်စံလွင် ဒေါ့ꩻလွေꩻဖေႏ ပွယ်ꩻအုံကွံ ငေါဝ်းနိဂုံး ထူႏသိမ်ꩻချာ ပွယ်ꩻအုံကွံအခန်ꩻအနာꩻ အကျောင်ꩻသေထွꩻဗာႏနဝ်ꩻသွူ။

ပအိုဝ်ႏစွိုးခွိုꩻအစွိုꩻ(PNO) နေင်ႏ(၅၀)ဗွေ အထိန်ꩻအမုဲင်တွမ်ႏ အထူꩻဒေႏသ(၆) ပအိုဝ်ႏစွိုးခွိုꩻအစွိုꩻ ငိမ်ꩻချံꩻရေꩻ(၃၅)နေင်ႏဗွေ အထိန်ꩻအမုဲင် ပွယ်ꩻထူႏဂွုဏ်ႏအခန်ꩻအနာꩻယို အီႏအွဥ်ႏလွေꩻ ပအို၀်ႏစွိုးခွိုꩻအဖဲ့ꩻပေါင်ꩻစွုမ်ႏ လွိုင်ႏကွိုန်ꩻသာႏယာႏရေꩻ(ဒဲဥ်သီႏဗွေကွင်ꩻ) ဟော်တန်ကို ၄ လာပဲင်ꩻ ဧပြီလာ (၉)(၁၀)(၁၁)နီꩻ သွံနီꩻအကျောင်ꩻ သေထွꩻဗာႏနုဲင်းနောဝ်ꩻသွူ။