အသက် ၄၉ နှစ်ရှိပြီဖြစ်သော Voyager 2 ဂြိုလ်တု Big Bang အစီအစဉ်ဖြင့် နောက်ထပ်တစ်နှစ် သက်တမ်းတိုး

သြဂုတ်(၁၀)၊၂၀၂၆။အမေရိကန်

၁၉၇၇ ခုနှစ်တွင် လွှတ်တင်ခဲ့ပြီး ယခု အသက် နှစ် ၄၉ ရှိနေပြီဖြစ်သော Voyager 2 အာကာသယာဉ်သည် ပလူတိုနီယမ် သတ္ထုအနှစ်ချုပ်ခြင်းမှ အပူကို လျှပ်စစ်အဖြစ် ပြောင်းလဲပေးသည့် ရေဒီယိုသတ္ထိကြွ အပူလျှပ်စစ်ထုတ်စက် (RTG) ကို အားထားနေရပြီး၊ နှစ်စဉ် ဝပ် ၄ ခန့် စွမ်းအင်ဆုံးရှုံးလျက်ရှိသည်။ ယင်းသို့ ဆက်လက်ဆုံးရှုံးနေပါက ၂၀၂၆ ခုနှစ် အကုန်မတိုင်မီ ကျန်ရှိနေသေးသော စက်ကိရိယာတစ်ခုကို ထပ်မံပိတ်ရမည့် အခြေအနေသို့ ရောက်ရှိနိုင်သည်။

ထိုအတွက် နာဆာ ဂျက် ပရိုပါလ်ရှင်း ဓာတ်ခွဲခန်း (JPL) မှ အင်ဂျင်နီယာများသည် Big Bang ဟု အမည်ပေးထားသော လျှပ်စစ်စွမ်းအင် ချွေတာရေးအစီအစဉ်ကို ကြိုးကိုင်အကောင်အထည်ဖော်ခဲ့သည်။ စက်ကိရိယာအချို့ကို တစ်ပြိုင်နက် ပိတ်လိုက်ပြီး စွမ်းအင်စားသုံးမှု နည်းသော အခြားစနစ်များဖြင့် အစားထိုးကာ၊ အာကာသယာဉ်ကို လုပ်ငန်းလည်ပတ်နိုင်လောက်အောင် အပူချိန် ဆက်လက်ထိန်းထားခဲ့ခြင်း ဖြစ်သည်။ တစ်ခုချင်းစီအလိုက် ဖြတ်တောက်မည့်အစား တစ်ပြိုင်နက် ညှိနှိုင်းလုပ်ဆောင်ခဲ့ခြင်းကြောင့် Big Bang ဟု အမည်ပေးထားခြင်း ဖြစ်သည်။

ဤသို့ ချွေတာရရှိလိုက်သော စွမ်းအင်ကြောင့် Voyager 2 တွင် ကျန်ရှိနေသေးသည့် သိပ္ပံစက်ကိရိယာ ၃ခု — သံလိုက်တိုင်းတာစက်၊ ပလာစမာလှိုင်းတိုင်းတာစနစ်နှင့် စကြာဝဠာရောင်ခြည်တိုင်းတာစနစ်တို့ — အနည်းဆုံး နောက်ထပ်တစ်နှစ် ဆက်လက်လည်ပတ်နိုင်တော့မည် ဖြစ်သည်။ အာကာသယာဉ်သည် ကမ္ဘာနှင့် အလွန်ဝေးကွာနေသဖြင့် အမိန့်ပေးချက်တစ်ခုစီ ရောက်ရှိရန် နီးပါးတစ်ရက်ခန့် ကြာမြင့်ပြီး၊ ပြန်လည်အကြောင်းပြန်ချက် ရရှိရန် နောက်ထပ်တစ်ရက်ခန့် ထပ်စောင့်ရသည်။ ထိုကဲ့သို့သော ကန့်သတ်ချက်များကြားမှပင် အင်ဂျင်နီယာအဖွဲ့သည် ဤအောင်မြင်မှုကို ရရှိခဲ့ခြင်း ဖြစ်ပြီး၊ ယခုအခါ Voyager 1 အတွက်လည်း အလားတူ အစီအစဉ်တစ်ခု ပြင်ဆင်လျက်ရှိသည်။

(သတင်းရင်းမြစ် — NASA JPL, Scientific American, Live Science)