စန္တာႏခမ်း၊ ဝေင်ꩻနယ်ႏကလော်ꩻ ပအိုဝ်ႏလိတ်လုဲင်ꩻစွစ်ꩻလီတာႏ ဝေင်ꩻနယ်ႏဗွေႏသံႏဃာႏအွဥ်ငါ မာꩻလွေꩻ နေင်ႏ(၃၅)ဗွေ ပွယ်ꩻစေလိတ်ပအိုဝ်ႏ

ဧပြီ ၃ နီꩻ၊ နေင်ႏ၂၀၂၆-ဗာႏ၊ကလော်ꩻ
ဖြောဝ်ꩻခမ်းနယ်ႏအခေါဝ်နောဝ်၊စန္တာႏခမ်း၊ ကလော်ꩻခရဲင်ႏ၊ ဝေင်ꩻနယ်ႏကလော်ꩻ တရျက်ꩻ(နန်းတိုင်း)ဒေႏသꩻ ပအိုဝ်ႏလိတ်လုဲင်ꩻစွစ်ꩻလီတာႏ ဝေင်ꩻနယ်ႏဗွေႏသံႏဃာႏအွဥ်ငါ ကဗွောင်သွဥ်လွေꩻဖေႏဒါႏ လိတ်ပအိုဝ်ႏနေင်ႏ(၃၅)ဗွေ ပွယ်ꩻတန် စေလိတ်ပအိုဝ်ႏယို နေင်ႏ ၁၃၈၇-ဗာႏ ဒဲဥ်ဟားလာလောင်း(၂)နီꩻ မွူးနီꩻသောကျာႏ ၁၂ နားရီႏအခိန်ႏ တရျက်ꩻ(နန်းတိုင်း)လိတ်စေဌာနꩻကို အောဝ်ႏစေလွေꩻ လိတ်ပအိုဝ်ႏအကျောင်ꩻ သေထွꩻဗာႏနောဝ်ꩻသွူ။

“ကျောင်ꩻပေ့ꩻခိန်ႏ ခမ်းသဲင်လာယို ပအိုဝ်ႏလိတ်လုဲင်ꩻစွစ်ꩻလီတာႏ ဝေင်ꩻနယ်ႏဗွေႏသံႏဃာႏအွဥ်ငါ စွုမ်ႏနေင်ႏကဗွောင်သွဥ်လွေꩻဖေႏဒါႏ နန်းတိုင်း(တရျက်ꩻ)ဒေႏသꩻလိတ်ပအိုဝ်ႏယို ခွပ်ဗွေလွေꩻလဲဥ်းနေင်ႏ(၃၅)အကျောင်ꩻသေထွꩻဗာႏအွဥ်ငါဗွေးဆရာႏတောႏ ဗွေႏအာလောက ကျောင်ꩻတရျက်ꩻနန်းတိုင်းထျꩻနဝ်ꩻသွူ။


တရျက်ꩻနန်းတိုင်းဒေႏသꩻ လိတ်စေဌာႏနကို ကနွို့စေလွေꩻဒါႏ လိတ်ပအိုဝ်ႏ ကျောင်ꩻသားခွန်နင်ꩻဖုံႏနဝ်ꩻ ဒုံဗောႏနင်ꩻကွုံꩻ ဒုံထွန်ꩻကွုံꩻ ဒုံပေါကဲ ဒုံကောင်နွဲ ဒုံကောင်ဖါး ဒုံဆေꩻကွုံꩻ ဒုံတောႏ ဒုံခါႏရွေး ဒုံတသာ ဒုံတခေါ့ꩻမွူး ဒုံတောင်ႏကွယ်ꩻ ဒုံထီသီ ဒုံဗန်းလွန်ꩻ ဒုံသစ်လ ဖုံႏအကျောင်ꩻ နွို့စေလွေꩻ ကျောင်ꩻသားခွန် / နင်ꩻ အဝ်ႏအဖြာꩻပေါင်ꩻ ၆၂၀လွိုနောဝ်ꩻသွူ။