(၇၇)နေင်ႏခွပ် ပွယ်ꩻတန်မွူးနီꩻခွိုꩻပအိုဝ်ႏ အီႏမာꩻလွေꩻဗွောင်ပွယ်ꩻအတာႏ နာႏထူႏလွေꩻ အန္တရယ်ႏကင်ꩻကမ္မဝါႏ ပရိတ်မေတ္တာႏတရာꩻ ဒဲဥ်သီႏဗွေဟော်တန်ကို

လာဖေဖော်ဝါရီ၁၄ နီꩻ၊ ၂၀၂၆-ဗာႏ၊
ဝေင်ꩻတောင်ႏကီꩻ၊ ကန်ႏတန်ရပ်ကွက်၊ ပအိုဝ်ႏစွိုးခွိုꩻအဖဲ့ꩻပေါင်ꩻစွုမ်ႏ လွိုင်ႏကွိုန်ꩻသာႏယာႏရေꩻ(ဒဲဥ်သီႏဗွေကွင်ꩻ) ဒဲဥ်သီႏဗွေဟော်တန်ကို ဟန်ႏနီꩻ လာဖေဖော်ဝါရီ ၁၄ နီꩻ မွူးရောဝ်ꩻခိုႏ(၉:၀၀) နားရီႏအခိန်ႏ (၇၇)နေင်ႏခွပ် ပွယ်ꩻတန်မွူးနီꩻခွိုꩻပအိုဝ်ႏ အီႏမာꩻလွေꩻဗွောင်ပွယ်ꩻအတာႏ နာႏထူႏလွေꩻ အန္တရယ်ႏကင်ꩻကမ္မဝါႏ ပရိတ်မေတ္တာႏတရာꩻ အကျောင်ꩻသေထွꩻဗာႏနောဝ်ꩻသွူ။

ရီးသွတ်ꩻ ဆရာႏတကာႏရွစ်သွိုဝင်ꩻ နမောတဿ သွံလဲင်ႏထွူခံႏထူႏလွေꩻ ငတ်ꩻပါꩻသီႏလ ဗွေႏဆရာႏတောႏ ကျောင်ꩻစူဠာမုနိထျꩻ၊ နောဝ်ꩻထွူ နေးထူးနာႏလွေꩻပါ အန္တရယ်ႏကင်ꩻကမ္မဝါႏ ပရိတ်မေတ္တာႏတရာꩻတောႏ ဗွေႏသံႏတောႏသီးထျꩻထွူ. ဆျာꩻထီ ယပ်ꩻနမ်းဖလွေꩻကုသိုလ်ႏ ကပ်လူႏလွေꩻပါ အလူႏစာႏတွမ်ႏ နဝကမ္မဝတ္ထုဖုံႏ အကျောင်ꩻ သေထွꩻဗာႏနောဝ်ꩻသွူ။

အော၀်ႏနောဝ်ꩻထွူ ဆရာႏ/တကာႏ ရွစ်သွိုဝင်ꩻ ဗုဒ္ဓသာသနံ စိရံ တိဌတု သွံလဲင်ႏ သိမ်ꩻထူႏချာအခန်ꩻအနာꩻထွူ ပအိုဝ်ႏလိတ်လုဲင်ꩻတွမ်ႏယေန်ႏငဲရေꩻအစွိုꩻ (ဗဟိုႏ)ဥက္ကဌ ဖြာတန်ခွန်ဝင်းကိုနောဝ်ꩻ လျောက်လောဝ်းထင်ႏလွေꩻ အစိုးရလိတ်သွဥ်ကျောင်ꩻကို ဖေႏကသွဥ်ထူႏလွေꩻနွောင်ꩻ လိတ်ပအိုဝ်ႏအတာႏ ထွာနွောင်ꩻဆရာႏအရန်းတွမ်ႏ(သင်ရိုးညွန်းတန်း)သွဥ်ထူႏလိတ်ပွုံႏအနယ်ꩻဖုံႏယို လျောက်လောဝ်းလွေꩻ ပအိုဝ်ႏလိတ်လုဲင်ꩻစွစ်ꩻလီတာႏ (ဗဟိုႏ)သံႏဃာႏထျꩻတဲင် ဗွေႏသံႏတောႏအနေႏဖဲ့ꩻလဲ့ အီႏထူႏတာႏဝွန်ႏခွုမ်မာꩻလွေꩻကိုဒျာႏအကျောင်ꩻ သေထွꩻဗာႏနောဝ်ꩻသွူ။

(၇၇)နေင်ႏခွပ် ပွယ်ꩻတန်မွူးနီꩻခွိုꩻပအိုဝ်ႏပွယ်ꩻယို ခမ်းကိုခမ်းထန်ႏ ကအီႏဗွောင်လွေꩻဒါႏပွယ်ꩻအတာႏနောဝ်ꩻ အန္တရယ်ႏကင်ꩻကင်ꩻ ဖေႏကမာꩻလွေꩻနွောင်ꩻ ရေႏမိုးလွေꩻနုဲင်းနောဝ်ꩻတဲင် နာႏထူႏလွေꩻရီး အန္တရယ်ႏကင်ꩻကမ္မဝါႏ ပရိတ်မေတ္တာႏတရာꩻတောႏ အကျောင်ꩻသေထွꩻဗာႏနောဝ်ꩻသွူ။