ဂျူပီတာဂြိုလ် မီးတောင်လ Io ၏ မြေအောက်အပူချိန်ကို Juno ဂြိုလ်တု ပထမဆုံး တိုင်းတာနိုင်

ဇူလိုင်၊၂၀၂၆။အမေရိကန်

NASA ၏ Juno အာကာသယာဉ်သည် ဂျူပီတာဂြိုလ်၏ လတစ်လုံးဖြစ်သော Io ၏ မြေမျက်နှာပြင်အောက်ခံ အပူချိန်ကို ပထမဆုံးအကြိမ် တိုင်းတာနိုင်ခဲ့ကြောင်း သိရသည်။ Io သည် နေအဖွဲ့စုအတွင်း မီးတောင်ပေါက်ကွက်အများဆုံးနှင့် မီးတောင်လှုပ်ရှားမှု အပြင်းထန်ဆုံး ကမ္ဘာဖြစ်သည်။

Juno သည် ၂၀၂၃ ခုနှစ် နှောင်းပိုင်းနှင့် ၂၀၂၄ ခုနှစ် အစောပိုင်းတွင် Io အနီးမှ နှစ်ကြိမ် ဖြတ်သန်းပျံသန်းခဲ့ပြီး၊ Io နှင့် ကီလိုမီတာ ၁,၅၀၀ ခန့်အထိ ချဉ်းကပ်ကာ၊ ၎င်း၏ Microwave Radiometer (MWR) ကိရိယာဖြင့် မြေမျက်နှာပြင်အောက်မှ ထွက်ပေါ်လာသော အပူလှိုင်းများကို တွေ့ရှိတိုင်းတာနိုင်ခဲ့သည်။ ရလဒ်များအရ မြေမျက်နှာပြင် အောက်သို့ ပေအနည်းငယ်သာ ဆင်းသွားသည့်တိုင် အပူချိန်သည် ဒီဂရီစင်တီဂရိတ် ၂၀ ကျော် ချက်ခြင်းမြင့်တက်သွားကြောင်း တွေ့ရှိခဲ့ရပြီး၊ ၎င်းမှာ နေရောင်ခြည်အပူချိန်တစ်ခုတည်းဖြင့် ရှင်းပြ၍မရနိုင်လောက်အောင် ပြင်းထန်သော အပူလှိုင်း ဖြစ်နေသည်။

Io ၏ အလွန်အမင်း ပြင်းထန်သော မီးတောင်လှုပ်ရှားမှုမှာ “tidal heating” ဟုခေါ်သော ဆွဲငင်အားအပူထုတ်လုပ်မှုကြောင့် ဖြစ်ပေါ်နေခြင်း ဖြစ်သည်။ Io သည် အနည်းငယ် ဘဲအသွင်ရှိသော ပတ်လမ်းကြောင်းအတိုင်း ဂျူပီတာကို လှည့်ပတ်နေရာ၊ ဂျူပီတာ၏ အလွန်ကြီးမားသည့် ဆွဲငင်အား ကြောင့် အဆက်မပြတ် ဆွဲဆန့်၊ ညှစ်ခံနေရသဖြင့် အတွင်းပိုင်းအပူ ကမ္ဘာထက်များစွာ ပိုမိုထွက်ရှိနေခြင်း ဖြစ်သည်။ ဤသုတေသနရလဒ်များကို Journal of Geophysical Research: Planets ဂျာနယ်တွင် ထုတ်ဖော်ခဲ့သည်။

(သတင်းရင်းမြစ် — NASA JPL, Sci.News, EarthSky)