ဝေင်ꩻဟိုပုံꩻ၊ နောင်တောင်ꩻပရဟိတတပ်ဦး ဗွေးဗွန်အွဉ်သွဉ် ပညာႏရေꩻကျောင်ꩻကို ကမာꩻလွေꩻဒါႏဝေင်ꩻနယ်ႏပေါင်ꩻစွုမ်ႏ လိတ်ပအိုဝ်ႏထင်ယံကျောင်ꩻသားမော့ꩻခွဲပွယ်ꩻ ဖေႏအပ်လွေꩻ ထင်ယံလွိုဆုꩻ အခန်ꩻအနာꩻ
ပညာရေး
လာမေ ၂၂ နီꩻ၊ နေင်ႏ ၂၀၂၆-ဗာႏ၊
ဝေင်ꩻဟိုပုံꩻ၊ နောင်တောင်ꩻပရဟိတတပ်ဦး ဗွေးဗွန်အွဉ်သွဉ် ပညာႏရေꩻကျောင်ꩻကို ကမာꩻလွေꩻဒါႏဝေင်ꩻနယ်ႏပေါင်ꩻစွုမ်ႏ လိတ်ပအိုဝ်ႏထင်ယံကျောင်ꩻသားမော့ꩻခွဲပွယ်ꩻ သာႏသနာႏနေင်ႏ ၂၅၇ဝ၊ ကောႏဇာႏနေင်ႏ ၁၃၈၈-ဗာႏ လာမေ(၂၂နီꩻ၊ ၅လာ ၊ ၂၀၂၆)ဗာႏ မွူးနီꩻ သောကျာႏ မွူးယာခိုႏ ခိန်ႏနဝ်ꩻ ဖေႏအပ်လွေꩻ ထင်ယံလွိုဆုꩻ အခန်ꩻအနာꩻနောဝ်ꩻသွူ။
အခန်ꩻအနာꩻကို ပွယ်ꩻကျွꩻလွဥ် ပရိတ်သတ်အမျာꩻ ကားကအဝ်ႏနေးတွမ်ႏ ဗုဒ္ဓပဏာမ နမော တဿ ဂါႏထာႏ (၃)လဲင်းတဲင် ဗွောင်လွေꩻ ဖေႏအပ်ဆုꩻအခန်ꩻအနာꩻတဲင် ကန်န္တော့ꩻထင်ႏလွေꩻ ရတနာႏသွံပါꩻ ခံႏထူႏလွေꩻပါ (၅)ပါꩻသီႏလ ဗွေႏဆရာႏတောႏကျောင်ꩻ အေးစေတီထျꩻထွူ တသွုပ်ချင်ႏ ဗွေႏဆရာႏတောႏတန်သီး ပရိတ်မေတ္တာႏတရာꩻ နဝ်ꩻသွူ။
အဝ်ႏနဝ်ꩻထွူ ပွယ်ꩻကျွꩻလွဥ် တကာႏအမျာꩻသီး နေးထူႏနာႏခံႏလွေꩻ ဗွေႏဆရာႏတောႏတန် ကျောင်ꩻအေးစေတီ ငဝ်းဩဝါဒနဝ်ꩻသွူ။ တသွုပ်ချင်ႏ နေးထူႏနာႏခံႏလွေꩻပါယင်း ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသ အွဉ်ငါ ဥက္ကဋ္ဌ ဖြားတန်ဦးခွန်ဖိုးစိန် ငေါဝ်းဟွိုန်ဟဝ်ဖေႏအာႏတမာအကျောင်ꩻ သေထွꩻဗာႏသွူ။
နဝ်ꩻထွူ ဝေင်ꩻနယ်ႏပေါင်ꩻစွုမ်ႏ လိတ်ပအိုဝ်ႏထင်ယံကျောင်ꩻသားမော့ꩻခွဲပွယ်ꩻ တွမ်ႏ လိတ်ပအိုဝ်ႏစေပွယ်ꩻကို ကလꩻထင်ႏဒါႏ ထင်ယံလွိုဆုꩻ ကျောင်ꩻသာႏပေႏစွိုꩻဖုံႏယို အွဥ်ငါတာႏဝွန်ႏအဝ်ႏပုဂ္ဂိုလ်ႏဖုံႏနဝ်ꩻ ဖေႏအပ်လွေꩻဖေႏ ထင်ယံလွိုဆုꩻ ထွူ ဗွေႏဆရာႏတောႏကျောင်ꩻလဲင်းကလ ဒေါ့ꩻလွေꩻဖေႏငေါဝ်းကေꩻဇူꩻတင်ႏ အကျောင်ꩻ သေထွꩻဗာႏနဝ်ꩻသွူ။
အခန်ꩻအနာꩻကို ဖြောဝ်ꩻခမ်းနယ်ႏအစိုးရအစွိုꩻ လျှပ်စစ်၊ စွမ်းအင်၊ စက်မှုတွမ်ႏ တဖူꩻသွုပ်ဆွိုက်ရေꩻဝွန်ႏတန် ဖြားခွန်သန်းထူး၊ ပအိုဝ်ႏစွိုးခွိုꩻအစွိုꩻ(PNO)ပါတီ အွဥ်အကိုရေꩻချွုတ် ဖြားခွန်သိန်းဖေတွမ်ႏအစွိုꩻ၊ ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသ အွဉ်ငါ ဥက္ကဋ္ဌ ဖြားတန်ဦးခွန်ဖိုးစိန်တွမ်ႏအစွိုꩻ၊ ခမ်းသားလွတ်တောႏနမ်းခြောင်ꩻတင်စွိုꩻ၊ ခမ်းနယ်ႏလွတ်တောႏ နမ်းခြောင်ꩻတင်ꩻစွိုꩻ၊ ပါတွမ်ႏ ကျောင်ꩻသားမွိုးဖါဖုံႏ ကျွꩻထင်ႏဖေႏအာႏလွေꩻအကျောင်ꩻ သေထွꩻဗာႏနဝ်ꩻသွူ။
NIYO Media သည် အချက်အလက် တိကျမှုကို အလေးထားပါသည်။ ဤသတင်းတွင် အမှားတစ်စုံတစ်ရာ တွေ့ရှိပါက ">ကျွန်ုပ်တို့ထံ အကြောင်းကြားပါ — စစ်ဆေးပြီး ပြင်ဆင်ပေးပါမည်။
