(၄၁)လဲင်ႏဗွေ တောင်ႏကီꩻခရဲင်ႏ၊ ဝေင်ꩻနယ်ႏလစ်ꩻဖြုံႏအကို ကဖြေႏထွူလွေꩻလဲဥ်းဒါႏ လိတ်ပအိုဝ်ႏယို အောဝ်ႏစဲစ် ကဲက်ꩻလွေꩻ တဖြေကွုံꩻကျောင်ꩻကို

လာဧပီ ၃ နီꩻ၊ နေင်ႏ၂၀၂၆-ဗာႏ၊
ဖြောဝ်ꩻခမ်းနယ်ႏအခေါဝ်နောဝ်၊ တောင်ႏကီꩻခရဲင်ႏ၊ ဝေင်ꩻနယ်ႏလစ်ꩻဖြုံႏအကို ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏအွဥ်ငါ ကဗွောင်သွဥ်လွေꩻဖေႏဒါႏ လိတ်ပအိုဝ်ႏနေင်ႏ(၄၁)ဗွေ ပွယ်ꩻတန် စေလိတ်ပအိုဝ်ႏယို အဝ်ႏဖြေႏလွေꩻထွူလဲဥ်းနဝ်ꩻမꩻ နေင်ႏ ၁၃၈၇-ဗာႏ ဒဲဥ်ဟားလာလောင်း (၂)နီꩻယို ဗွေႏသံႏဃာႏတွမ်ႏ လိတ်သွဥ်ဆရာႏခို/ဆရာႏမူႏသီး အောဝ်ႏစဲစ် အဝ်ႏကဲက်ꩻလွေꩻဖေႏ လိတ်အဖြေႏမဲဥ်ႏ ညောင်ႏရွီႏဝေင်ꩻနယ်ႏ အွိုင်ႏတဖြေကွုံꩻ ဗွေႏဆရာႏတောႏ ကျောင်ꩻတဖြေကွုံꩻကို အကျောင်ꩻ သေထွꩻဗာႏနဝ်ꩻသွူ။

(၄၁)လဲင်ႏဗွေ ပအိုဝ်ႏလိတ်လုဲင်ꩻစွစ်ꩻလီတာႏ ဝေင်ꩻနယ်ႏ သံႏဃာႏစွိုꩻအွဥ်ငါတဲင်တွော့ꩻ (၄၁)လဲင်ႏဗွေ အောင်ႏမျင်ႏလွေꩻဒါႏ လိတ်ဖြေႏပွယ်ꩻယိုအတာႏ ကဖြေႏထွူလဲဥ်းဒါႏ အွိုင်ႏပေါင်ꩻ(၂၇)အ ကို ဌာႏနပေါင်ꩻစွုမ်ႏ ဝေင်ꩻနယ်ႏကိုယ်ႏစာꩻ အွိုင်ႏကိုယ်ႏစာꩻ ဗွေႏရဟန်ꩻသံႏဃာႏသီးတွမ်ႏဆရာႏခို ဆရာႏမူႏသီး ကျွꩻလွဥ်ကဲက်ꩻဖေႏ လိတ်စေအမဲဥ်ႏ အကျောင်ꩻ သေထွꩻဗာႏနဝ်ꩻသွူ။

ပွိုင်းနေင်ႏကဖြေႏဒါႏ လိတ်ပအိုဝ်ႏယိုနဝ်ꩻ အဝ်ႏအဖြာꩻပေါင်ꩻ နီသောင်ႏလွိုတဲင် တယ်ႏစွဥ်ႏကိုဗစ်ရောႏဂါႏ ကထွိုင်ႏထွာမာလွဥ်ယို ဟန်ႏနေင်ႏနဝ်ꩻ အဝ်ႏကုဲင်ဒျာႏ တသောင်ႏလွိုပေႏဒျာႏ စာႏရင်ꩻအလꩻနဝ်ꩻ အဝ်ႏ (၁၈၀၀၀)လွိုရိုꩻကီတဲ့ ထွိုင်ႏချွုတ်စာႏနဝ်ꩻ အဝ်ႏလွေꩻဒျာႏ (၁၅၀၀၀)လွုမ်ꩻ ကအောဝ်ႏဖြေႏဒါႏလိတ်ပအိုဝ်ႏဟန်ႏနေင်ႏယို စွုမ်ႏအွိုင်ႏနဝ်ꩻ အယွမ်ꩻထိုꩻအာငါႏ၊ အကျောင်ꩻပျုတွမ်ႏ လိတ်စေပွယ်ꩻယိုနဝ်ꩻ ပွိုင်းဝွို့တွမ်ႏ ဘောလုံးပွယ်ꩻ အွဥ်ႏသွိုထိုꩻ လိတ်ဖြေႏပွယ်ꩻတဖဲ့ꩻ တနꩻထိုꩻပွယ်ꩻပင်ꩻတဖဲ့ꩻစားနဝ်ꩻတဲင် ကထွာဒါႏလိုꩻယွဲးဖုံႏနဝ်ꩻ သွဥ်ဗာႏတဝ်းလိတ်ပအိုဝ်ႏ ဟန်ႏနေင်ႏနဝ်ꩻ ထွားစွဥ်ႏအွိုင်ႏမုဲင်ꩻမုဲင်ꩻတဲ့ အဝ်ႏအာဒျာႏ ကျောင်ꩻသားပေႏဖုံႏလွုမ်ꩻ အကျောင်ꩻ သေထွꩻဗာႏနဝ်သွူ။

တောင်ႏကီꩻခရဲင်ႏ ဝေင်ꩻနယ်ႏလစ်ꩻဖြုံႏ ကိုယ်ႏစာꩻပျု ဗွေႏရဟန်ꩻသံႏဃာႏသီး တွမ်ႏ ဆရာႏခိုဆရာႏမူႏသီး အဝ်ႏထူႏတာဝွန်ႏခွုမ်မာꩻ ကဲက်ꩻလွေꩻဖေႏ လိတ်စေအဖြေႏမဲဥ်ႏတဲင် လိတ်ကဲက်ꩻပွယ်ꩻဟန်ႏနေင်ႏယိုနဝ်ꩻ အွဥ်ႏလွေꩻဝေင်ꩻနယ်ႏ ညောင်ႏရွီႏ၊ အွိုင်ႏတဖြေကွုံꩻ ကျောင်ꩻတဖြေကွုံꩻကိုလိတ်ကဲက်ꩻဆရာႏဗွေႏသံႏဃာႏနဝ်ꩻ အဝ်ႏအပါꩻပေါင်ꩻ(၁၂၇)ပါꩻ၊ ဆရာႏခို အဝ်ႏ(၅၅)ဖြာꩻ၊ ဆရာႏမူႏ အဝ်ႏ(၁၁၀)ဖြာꩻ စုခြွဥ်းအ၀်ႏ (၂၉၂)ပါꩻ ဖြာꩻအကျောင်ꩻ သေထွꩻဗာႏန၀်ꩻသွူ။