(၇၇)နေင်ႏခွပ် ပွယ်ꩻတန်မွူးနီꩻခွိုꩻပအိုဝ်ႏ(ဗဟိုႏ) ထူႏဂွုဏ်ႏပူႏဇောႏလွေꩻ အောင်ႏလိတ် လꩻဘွဲ့ ဗွေႏသံႏဃာႏ တွမ်ႏ ခွန်/နင်ꩻသီး ကလꩻဒါႏ စွန်ꩻထီထင်ဆုꩻ အခန်ꩻအနာꩻ

မတ်လာ ၂ နီꩻ၊ ၂၀၂၆-ဗာႏ
ဝေင်ꩻတောင်ႏကီꩻ၊ ပထမကျောင်ꩻတန်မွဥ်ခြဲမ် ပရိယတ္တိလိတ်သွဥ်တွိုက်ကို နေင်ႏ၁၃၈၇-ဗာႏ ဒဲဥ်သီႏလာဗွေနီꩻ (၇၇)ခွပ်နေင်ႏခွပ် ပွယ်တန်မွူးနီꩻခွိုꩻပအိုဝ်ႏ(ဗဟိုႏ) ထူႏဂွုဏ်ႏပူႏဇောႏလွေꩻ နဲင်ႏငံႏတောႏ အစိုးရ ကဖေႏအပ်ဒါႏ အောင်ႏလိတ် လꩻဘွဲ့ ဗွေသံႏဃာႏတွမ်ႏ ခွန်/နင်ꩻသီးကလꩻဒါႏ စွန်ထီထင်ဆုꩻ အခန်ꩻအနာꩻအကျောင်ꩻ သေထွꩻဗာႏနောဝ်ꩻသွူ။

အခန်ꩻနာꩻကို တကာႏပရိတ်သတ်အမျာꩻ နေးခံႏထူႏလွေꩻသဥ်သီႏလ(၅)ပါꩻ တွမ်ႏသရဏဂုံႏ(၃) ပါꩻ ဝေင်ꩻနယ်ႏတောင်ႏကီꩻ၊ အွိုင်ႏပေါမူ ပေါမူပရိယတ္တိ လိတ်သွဥ်တွိုက် ပဓာန နာယကဆရာႏတောႏ ထျꩻ ဗွေႏသံဃာႏတောႏသီး ပို့ꩻပသာလွေꩻဖေႏ ပရိတ်မေတ္တာႏတရာꩻထီခွꩻနောဝ်ꩻသွူ။
နောဝ်ꩻထွူ ပအိုဝ်ႏခမ်းသားအမျာꩻ နမ်းခြောင်ꩻတင် ခွန်အောင်ဆန်း လျောက်လောဝ်းထင်ႏ သာႏသနာႏဖဲ့ꩻဆဲင်ႏရာꩻ ငေါဝ်းငွါထွူ၊ အမရပူရဝေင်ꩻ ဒေါက်တာတင်ထွန်း ကတဲမ်းပူႏဇောႏဒါႏ (စုပေါင်းဂုဏ်ရည်အောင်ပွဲဆီသို့) ဂုဏပူဇာပထျဝတ္တဂါထာတောႏ ယို ဓမ္မာစရိယ ဦးမောင်မောင်ကြီး ရွတ်ဖတ်ပူႏဇောႏနယ်လွေꩻဖေႏတဲင်မွိုးကျောင်ꩻဦး ပအိုဝ်ႏဝိသာခါ ဓမ္မစကျာႏအစွိုꩻအွဥ်အထျꩻ ဓမ္မစကျာႏစွိုꩻကားကအောဝ်ႏ ထူႏဂွုဏ်ႏပူႏဇောႏလွေꩻတွမ်ႏ ကဗျာလင်္ကာႏထွူတဲင် ပအိုဝ်ႏခမ်းသားအမျာꩻကိုယ်ႏစာꩻ ပွယ်ꩻကောႏမတီႏစွိုꩻဖုံႏ ကပ်လူႏပူႏဇောႏလွေꩻ ဘွဲ့လꩻသံဃာႏတွမ်ႏ စွန်ꩻထီထင်ဆုꩻအကျောင်ꩻ သေထွꩻဗာႏနောဝ်ꩻသွူ။

အောဝ်ႏနောဝ်ꩻထွူ ဟံႏသွူꩻဓမ္မတေးဂီတသားစွိုꩻ ထူႏဂွုဏ်ႏပူႏဇောႏလွေꩻ ဓမ္မတေးတဲင် ပရိတ်သတ်အမျာꩻ နေးထူႏနာႏခံႏလွေꩻပါ အနုမောဒနာႏတရာꩻ ဗွေဆရာႏတောႏကျောင်ꩻပေါမူထျꩻထွူ
သာႏသနာႏပင်ႏထိုရေꩻအစွိုꩻ(ဥက္ကဌ) ဆရာႏခွန်မင်းကျော်နဝ်ꩻ ယပ်ꩻနမ်းဆျာꩻထီ ဖန်းဖေႏကုသိုလ်ႏနောဝ်ꩻသွူ။

နဲင်ႏငံႏတောႏအစိုးရ ကဖေႏအပ်လွေꩻဒါႏ အောင်ႏလိတ် လꩻဘွဲ့ ဗွေႏသံႏဃာႏ တွမ်ႏ ခွန်/နင်ꩻသီးကလꩻဒါႏ စွန်ထီထင်ဆုꩻယိုနောဝ်ꩻ နဲင်ႏငံႏတောႏဆဲင်ႏရာꩻလꩻဘွဲ့( ၃) ပါꩻ၊ Ph.D ဘွဲ့လꩻ(၃)ပါꩻ၊MA ဘွဲ့လꩻ ၁ ပါꩻ၊ သာသနဓမ္မာစရိယ ဘွဲ့လꩻ(၁၇)ပါꩻ၊ အဘိဓမ္မဝိဒူ ဘွဲ့လꩻ ၁ ပါꩻ၊ ဒီဃနိကာယဝိဒူဘွဲ့လꩻ ၁ ပါꩻ၊ ဥဘတောဝိဘင်္ဂဓရ ဘွဲ့လꩻ ၁ ပါꩻ၊ သာသနာလင်္ကာရသာႏမဏေႏကျောႏ ၁၈ ပါꩻ၊ ဂုဏ်ထူးဆောင်(စွန်ꩻထီထင်)ဆုꩻလꩻ ၂၈ ဖြာꩻ စုခြွဥ်း အောဝ်ႏ (၇၃)ပါꩻ/ဖြာꩻ အကျောင်ꩻ သေထွꩻဗာႏနောဝ်ꩻသွူ။