ပအိုဝ်ႏစွိုးခွိုꩻအစွိုꩻ(PNO) တွမ်ႏ အွိုင်ႏထီရီး ဒေႏသခံႏ ဖူးဝေးမွိုးဖါလွောင်ႏဗူႏ ဆွန်ꩻစူဝင်ꩻတဲင် ဗွောင်လွေꩻ ခမ်းသဲင်လာ အဖဲ့ꩻပေါင်ꩻစွုမ်ႏ စွန်ꩻထီထင်သွဉ်တန်ꩻဗွောင်ပွယ်ꩻ

လာဖေဖော်ဝါရီ ၂၁ နီꩻ၊ ၂၀၂၆

အထူꩻဒေႏသ(၆)၊ ခွန်ဖြားဗွာခမ်း ကန်ႏတောႏတန်ဝေင်ꩻနယ်ႏ၊ အွိုင်ႏထီရီး ထီဟန်ႏတာႏကျောင်ꩻတွိုက်တန်အကို ပအိုဝ်ႏစွိုးခွိုꩻအစွိုꩻ(PNO) ပါတီ တွမ်ႏ အွိုင်ႏထီရီး တအွိုင်ႏလွုမ်းဆဲင်ꩻရာꩻ ဒေႏသခံႏ ဖူးဝေးမွိုးဖါလွောင်ႏဗူႏ ဆွန်ꩻစူဝင်ꩻတဲင် ဟန်ႏနီꩻ လာဖေဖော်ဝါရီ ၂၁ နီꩻ ၂၀၂၆ ဗာႏနေင်ႏ ၉:၃၀ အခိန်ႏ ဗွောင်လွေꩻ ခမ်းသဲင်လာ လိတ်ပအိုဝ်ႏ၊ အင်္ဂလိပ်၊ ဗုဒ္ဓယေဉ်ႏငဲမု တွမ်ႏ အဖဲ့ꩻပေါင်ꩻစွုမ်ႏစွန်ꩻထီထင်သွဉ်တန်ꩻ အကျောင်ꩻသေထွꩻဗာႏနဝ်ꩻသွူ။
အရီးသွတ်ꩻအနေႏ ကန်းတော့ꩻထင်ႏဗွေႏဆရာႏတောႏ ခံႏထူႏလွေꩻသီႏလငတ်ပါꩻ နာႏထူႏလွေꩻ ကျောင်ꩻစံကာႏပရဟိတ ဗွေႏဆရာတောႏ ဘဒန္တသုဝဏ္ဏသြဝါဒနဝ်ꩻသွူ။ အဝ်ႏနဝ်ꩻထွူ ပအိုဝ်းစွိုးခွိုꩻ အစွိုꩻ(PNO)ပါတီအွဉ်အကိုꩻရေꩻဖြားခွန်သိန်းဖေ ဒေါ့ꩻလွေꩻဖေႏငဝ်းနွန်ႏဖေႏအာႏနဝ်ꩻသွူ။ ငဝ်းနွန်ႏဖေႏအာႏအကို ခမ်းသဲင်လာကဗွောင်ဗာႏစွန်ꩻထီထင်သွဉ်တန်ꩻယိုနဝ်ꩻ ပိုလီꩻသီးနမ်းဖေႏကယံ အွဉ်ႏနယ်လွေꩻတဖူးရော့ꩻအကျောင်ꩻ ၊ပိုလီꩻလိုꩻယွဲဖုံႏယိုနဝ်ꩻ အဝ်ႏလိုႏနွောင်ꩻ ငါႏပတ်ဝန်းကျင်အကျောင်ꩻ တနီꩻခါနီပအိုဝ်ႏလိုꩻမျိုꩻအနာႏဂတ်ဖေႏကယံထဲင်းထဲင်းနဝ်ꩻ အဝ်ႏဒင်ႏဒျာႏပိုလီꩻသီးအလောင်းအကျောင်ꩻ၊ နဝ်ꩻမꩻပိုလီꩻလိုꩻယွဲးသီးဖုံႏ နမ်းတွမ်ႏနမ်းတဲ့ အွဉ်ႏတန်ႏဖိုꩻသွော့အကျောင်ꩻ၊ နီနမ်းတွမ်ႏနီနမ်းတဲ့ ယံကတယ်ႏဆို့ꩻလွေꩻဒျာႏသွော့အကျောင်ꩻ၊ နဝ်ꩻမꩻပိုလီꩻသီးအွဉ်ဝင်ꩻ ကျိုꩻစာꩻဖေႏသွော့အကျောင်ꩻ” နွန်ႏဖေႏအာႏလွေꩻဖေႏ ငဝ်းနုဲင်းနဝ်ꩻသွူ။
ပအိုဝ်ႏလိုꩻယွဲးအွဉ်ငါ သွဉ်တန်ꩻတာႏဝွန်ႏခံႏ ဆရာႏခွန်ထွန်းလှိုင်တဲ့ ပတ်သဲက်တွမ်ႏသွဉ်တန်ꩻ အကျောင်ꩻခရာႏဖုံႏယိုဒေါ့ꩻနယ်လွေꩻဖေႏယင်းနဝ်ꩻသွူ။

အွိုင်ႏထီရီး ထီဟန်ႏတာႏကျောင်ꩻတွိုက်တန်အကို ပအိုဝ်ႏစွိုးခွိုꩻအစွိုꩻ(PNO) တွမ်ႏ အွိုင်ႏထီရီးတအွိုင်ႏလွုမ်းဆဲင်ႏရာꩻ ဒေႏသခံႏ ဖူးဝေးမွိုးဖါလွောင်ႏဗူႏ ဆွန်ꩻစူဝင်ꩻတဲင် ဗွောင်လွေꩻခမ်းသဲင်လာ အဖဲ့ꩻပေါင်ꩻစွုမ်ႏ စွန်ꩻထီထင်သွဉ်တန်ꩻဗွောင်လွေꩻပွယ်ꩻအကို ဗွေႏရဟန်ꩻသံႏဃာႏတွမ်ႏ ပအိုဝ်ႏစွိုးခွိုꩻအစွိုꩻ(PNO) ပါတီ တာႏဝွန်ႏအဝ်ႏပုဂ္ဂိုလ်ႏလိုꩻတန်သီး၊ သွဉ်ꩻတန်ꩻဆရာႏ၊သွဉ်တန်ꩻသား ဒေႏသခံႏ ဖူးဝေးမွိုးဖါသီး စုပေါင်ꩻ (၄၀၀) လစ်ꩻရျာꩻလွို ကျွꩻထင်ꩻလွဉ်ဝင်ꩻအကျောင်ꩻသေထွꩻဗာႏနဝ်ꩻသွူ။