ကတိုꩻတက်လဲဥ်းဒါႏ ဝင်ꩻခမ်းပညာႏရေꩻယို နီပိုနီလီꩻဖုံႏ ဖေႏနေႏကထွꩻလꩻဝင်ꩻမꩻ ဗွောင်သွဥ်လွေꩻဖေႏဗာႏ စွန်ꩻထီထင်သွဥ်တန်ꩻအကျောင်ꩻ ဗွေႏဆရာႏတောႏ ဘဒ္ဒန္တ သုဝဏ္ဏ ဒေါ့ꩻခြဲုင်းနယ်လွေꩻ

လာဖေဖော်ဝါရီ ၂၁နီꩻ၊ ၂၀၂၆

အထူꩻဒေႏသ(၆)၊ ခွန်ဖြားဗွာခမ်း၊ ကန်ႏတောႏတန်ဝေင်ꩻနယ်ႏ၊ အွိုင်ႏထီရီး တအွိုင်းလွုမ်းဆဲင်ႏရာꩻ ကျောင်ꩻတွိုက်တန် ထီဟန်ႏတာႏကို ပအိုဝ်ႏစွိုꩻခွိုꩻအစွိုꩻ(PNO)ပါတီ တွမ်ႏ ဒေႏသခံႏဖူးဝေးမွိုးဖါ ဆွန်ꩻစူဝင်တဲင် ခမ်းသဲင်လာ လိတ်ပအိုဝ်ႏ၊ အင်္ဂလိပ်၊ ဗုဒ္ဓယဥ်ႏငဲမုꩻ တွမ်ႏ အဖဲ့ꩻပေါင်ꩻစွုမ်ႏစွန်ꩻထီထင်သွဥ်တန်ꩻယို လာဖေဖော်ဝါရီ ၂၁နီꩻ၊ ၂၀၂၆ ဗာႏ မွူးရဝ်ꩻခိုႏ (၉:၃၀)အခိန်ႏ မာꩻလွေꩻ ဗွောင်ပွယ်ꩻအခန်ꩻအနာꩻကို ကတိုꩻတက်လဲဥ်းဒါႏ ဝင်ꩻခမ်းပညာႏရေꩻယို နီပိုနီလီꩻဖုံႏ ဖေႏနေႏကထွꩻလꩻဝင်ꩻမꩻ ဗွောင်သွဥ်လွေꩻဖေႏဗာႏ စွန်ꩻထီထင်သွဥ်တန်ꩻအကျောင်ꩻ ဗွေႏဆရာႏတောႏ ဘဒ္ဒန္တ သုဝဏ္ဏ ဒေါ့ꩻဟော်ꩻခြဲုင်းနယ်လွေꩻဖေႏ နုဲင်းနောဝ်ꩻသွူ။

ဗွောင်ပွယ်ꩻအခန်ꩻနာꩻကိုယို “ခေါင်းဆောင်တန် ဖြားခွန်သိန်းဖေ အွဥ်ငါတကာႏလုံဖုံႏ နမ်းကိုယ်ႏတဲင်ႏ လွဥ်တွိုႏဖေႏအာႏ ထီႏဗာႏခွဲဗာႏနုဲင်းယိုနောဝ်ꩻ ဟွိုန်ဟောဝ်သꩻရေꩻငါႏအကျောင်ꩻ၊ နောဝ်ꩻမꩻ ခေါင်းဆောင်တန်သီး ကအွဥ်ငါမာꩻလွေꩻဒါႏ ထာꩻမာꩻနဲုင်းယိုခါနောဝ်ꩻ ဟွိုန်ဟောဝ်အာႏရꩻငါႏ အကျောင်ꩻ၊ နီကမာꩻထာမာꩻယိုခါနောဝ်ꩻ ခေါင်းဆောင်တကာႏ လိုꩻလမ်းသီးဖုံႏတဲ့နောဝ်ꩻ အဖဲ့ꩻဖဲ့ꩻအခေါဝ်ခေါဝ် နွောင်ꩻရာꩻကမာꩻဒါႏ ထာꩻမာꩻမန်ႏသမျယိုနောဝ်ꩻ နီထာꩻထီႏအောဝ်ႏနုဲင်းမုဲင်ꩻနဲတဲင် ထီႏအနာႏဂါတ်ဆꩻငါ နီပိုနီလီꩻ ဖေႏနေးကထဲ့ဖွိုႏဗာႏမွိုန်းတွမ်ႏ ဖူးဝေးလိုꩻမျိုꩻလင် ဖေႏနေးကတခွိုန် တန်ႏတူႏလꩻဝင်ꩻ မဥ်ႏဒေါ့ꩻဗာႏ ကတိုꩻတက်လဲဥ်းဒါႏ တွမ်ႏဝင်ꩻခမ်းလင် နောဝ်ꩻ နီပအိုဝ်ႏလိုꩻမျိုꩻယို ဖေႏနေးကထွꩻလꩻဝင်ꩻ နောဝ်ꩻနောဝ်ꩻ စွုမ်ႏဖြီးစွုမ်ႏဖြာꩻ ဗွေႏဗွန်သီး ဆန္ဒအဝ်ႏစားနဝ်ꩻမꩻ မာꩻလွဥ်ဗာႏ ပရဟိတထာꩻမာအကျောင်ꩻ၊ ကမာꩻလွဥ်ပရဟိတ ယိုနဝ်ꩻ ထီႏငါႏပိုလီꩻအနာႏဂါတ်ဆꩻငါတာႏ လိုꩻပေႏဖေႏကဗꩻငါနဝ်ꩻ အဝ်ႏဆꩻချာ နွန်ႏဖေႏအာႏ နဝ်ꩻမꩻ မာꩻဖေႏဗာႏထာꩻမာꩻ အဖဲ့ꩻပေါင်ꩻစွုမ်ႏ စွန်ꩻထီထင်သွဥ်တန်ꩻနုဲင်းယိုအကျောင်ꩻ” ဒေါ့ꩻဟော်ꩻခြဲုင်းနယ်လွေꩻဖေႏ နုဲင်းနောဝ်ꩻသွူ။

“အနာႏဂါတ်ဆꩻငါနောဝ်ꩻ ကထွာဒါႏမွိုးဖါဖုံႏ ရပ်တွိုင်ꩻရပ်တွိုင်ꩻ အုံတီႏအုံကြွို့ꩻငါႏမွိုန်းတဝ်းဒွုမ် အနယ်ꩻလီꩻ အနယ်ꩻယဖုံႏကထွာဒါႏ အအံႏအအွꩻ ဖေင်ꩻဖင်ꩻ ယာလံ ယာမဖုံႏယိုနဝ်ꩻ ထွာအီငါႏ အနုတ်လက္ခဏာႏ မာꩻကုဲင်နီလိုꩻသီး စီꩻပွာꩻရေꩻ နဝ်မꩻ ကထွာမွိုးဖါဖုံႏနဝ်ꩻ နီပိုနီလီꩻ အနီꩻအရင်ꩻယို အဝ်ႏကုဲင်ဖေႏအာႏပညာႏလွုမ်ꩻ သွဥ်တန်ꩻကာႏလ ယို(၃)သွံလာနဝ် တန်ႏဖိုꩻဖေႏကအဝ်ႏနဝ်ꩻ ကျိုꩻစာꩻသွော့ဝင်ꩻ ပငါပရာအကျောင်ꩻ” ဒေါ့ꩻဟော််ꩻခြဲုင်းနယ်သွုပ်ယင်းနဝ်ꩻသွူ။

ဗွောင်ပွယ်ꩻအခန်ꩻယို ခံႏနွမ်ꩻလွေꩻ စွိုးခွိုꩻအလံႏတောႏ၊ နေးထူႏလွေꩻ သဥ်သီႏလငတ်ꩻပါꩻ ဗွေႏဆရာႏတောႏ ဘဒ္ဒန္တ သုဝဏ္ဏ ကျောင်ꩻထီဟန်ႏတာႏထျꩻထွူတဲင် ဖြောဝ်ꩻခမ်းနယ်ႏ စွိုးခွိုꩻလွတ်တောႏအမတ် ခွန်စောလွင်တွမ်ႏ ညောင်ႏရွီႏဝေင်ꩻနယ်ႏ ခမ်းနယ်ႏလွတ်တောႏ အမတ် ခွန်စနေႏအောင်ႏသီး မိတ်သွုပ်နယ်လွေꩻဖေႏ နမ်းခြောင်ꩻအအဲဥ်ႏ တွမ်ႏလွတ်တောႏအကျောင်ꩻအခရာႏဖုံႏထွူ ပအိုဝ်ႏလိုꩻယွဲအွဥ်ငါ သွဥ်တန်ꩻတာႏဝွန်ႏခံႏ ဆရာႏခွန်ထွန်းလှိုင်နဝ်ꩻ ဒေါ့ꩻခြဲုင်းနယ်လွေꩻဖေႏ သွဥ်တန်အကျောင်ꩻအခရာႏ၊ ပအိုဝ်ႏစွိုးခွိုꩻအစွိုꩻ(PNO)ပါတီ အွဥ်အကိုရေꩻခွျုတ် ဖြားခွန်သိန်းဖေ နဝ်ꩻ ဒေါ့ꩻဖေႏအာႏလွေꩻ သွဥ်တန်ꩻသား ငဝ်းဖေႏအာႏနွန်ႏတမာအကျောင်ꩻအခရာႏဖုံႏနဝ်ꩻသွူ။

ဗွောင်ပွယ်ꩻအခန်ꩻအနာꩻကို ပအိုဝ်ႏစွိုးခွိုꩻအစွိုꩻ (PNO)ပါတီ အွဥ်အကိုရေꩻခွျုတ် ဖြားခွန်သိန်းဖေတွမ်ႏအစွိုꩻအဗူႏ၊ တာႏဝွန်ႏအောဝ်ႏပုဂ္ဂိုလ်ႏဖုံႏ၊သွဉ်တန်ꩻဆရာႏဖုံႏ၊ အွိုင်ႏထီရီးတဖြုံႏလွုမ်း သွဉ်တန်ꩻသားခိုမူႏဖုံႏတွမ်ႏ ဒေႏသခံႏခမ်းသားမွိုးဖာဖုံႏ ထင်လွဉ် (၄၀၀)လွို အကျောင်ꩻသေထွꩻဗာႏ နောဝ်ꩻသွူ။
သွဥ်တန်ꩻယိုနောဝ်ꩻ ဗွောင်သွဥ်လွေꩻ တယ်ႏဒဲဥ်သီႏလာဆန်ꩻ (၆)နီꩻ ဗꩻလွေꩻ ဒဲဥ်စေတ်ꩻလာဆန်ꩻ(၆)နီꩻ တပတ်နဝ်ꩻ သွဥ်လွေꩻဖေႏ (၆)နီꩻ သွဥ်တန်ꩻဆရာႏဖုံႏ သွဥ်လွေꩻဖေႏ လိတ်ပအိုဝ်ႏ၊ အင်္ဂလိပ်၊ ဗုဒ္ဓယဥ်ႏငဲမုꩻ တွမ်ႏ အဖဲ့ꩻပေါင်ꩻစွုမ်ႏစွန်ꩻထီထင် ဖုံႏအကျောင်ꩻ သေထွꩻဗာႏနောဝ်ꩻသွူ။