တညတောဝ်းအခိန်ႏ အွိုင်ႏလုံးပဲဉ် ခမ်းသားမွိုးဖါအမျာꩻ သဲင်ꩻအုံချာဗာႏသွူ ရပ်ရာႏဒုံဆောင်ႏ လမ်းပါႏကိုအကျောင်ꩻခရာႏသတင်ꩻ

အထူꩻဒေႏသ(၆) ပအိုဝ်ႏနမ်းပဲင်ႏအုပ်ချုပ်ခွင်ꩻလꩻဒေႏသ၊ ဝေင်ꩻနယ်ႏပင်လောင်ꩻ၊ အွိင်ႏလုံးပဲဉ်ကိုကအောဝ်ႏဒါႏ ဒုံကောင်မုဲင်းသင်ꩻ၊ ဒုံပင်ပွံ၊ ဒုံနန်းနိမ်ႏ၊ ဒုံလုံးပဲဉ်စတဲင် ဒုံနောဝ်ꩻကို ကအောဝ်ႏခမ်းသားမွိးဖါသီး တညတောဝ်းအခိန်ႏ အီႏသဲင်ꩻအုံချာဗာႏသွူ ဒုံဆောင်ႏ၊ လမ်းပါႏကိုအကျောင်ꩻ သေထွꩻဗာႏသွူ

ပင်ꩻလောင်ဝေင်ꩻနယ်ႏအခဝ်နဝ်၊ အွိင်ႏလုံးပဲဉ်ကိုကအောဝ်ႏဒါႏ ဒုံကောင်မုဲင်းသင်ꩻ၊ ဒုံပင်ပွံ၊ ဒုံနန်းနိမ်ႏ၊ ဒုံလုံးပဲဉ်စတဲင် ဒုံကိုဖုံႏနောဝ်ꩻ ၂၀၂၃ ဗာႏနေင်ႏ မတ်လာတွင်ꩻကို ကထွာဒါႏ အယားသားစွိꩻ ကရင်နီအမျိုးသားကာကွယ်ရေးတပ်(KNDF) စွိꩻနောဝ်ꩻ နွိအုံခိုႏလꩻထိုꩻတဲင် ဒုံသားဖုံႏတဲ့ ဖင်းထန်ႏလွင်းထိုꩻလဲ့ဗာႏဒုံ ညစွဉ်ႏ (၃)နေင်ႏရပ်ထွူတဲင် ခမ်းသားအမျာꩻဖုံႏ အံႏအွꩻရေꩻ၊ ဆိုꩻရုဲင်ꩻရေꩻ၊ ပညာႏရေꩻဖုံႏတဲ့ ကုဲင်ပြင် သွုမ်ꩻထိုꩻဗာႏလိုစွဉ်ႏနောဝ်ꩻသွူ

ကွပ်စွဉ်ႏအယားသာစွိꩻ ကရင်နီအမျိုးသားကာကွယ်ရေးတပ်(KNDF) နွိယားဒုံဆောင်ႏနောဝ်ꩻမꩻ ဒုံကိုဖုံႏတဲ့ နွိသော့ꩻတလꩻဒွုမ် ဗွေႏဆရာႏတောႏကျောင်ꩻကိုတဲ့ ကထွာဒါႏ ကရင်နီအမျိုးသားကာကွယ်ရေးတပ်(KNDF) အယားသားစွိꩻ နွိယားကုဲင် မွေႏထိုꩻတခြိုꩻဖုံႏတဲင် ကျောင်ꩻတဲ့ ကုဲင်ပြင်ထိုꩻဗာႏ ကရင်နီအမျိုးသားကာကွယ်ရေးတပ်(KNDF) အယားသားစွိꩻယိုနောဝ်ꩻ ဒုံကိုလမ်ႏပါႏတဲ့ မာꩻသော့ꩻစွဉ်ႏ ဝွေꩻသီးစခန်ꩻ၊ ဗွေႏဆရာႏတောႏကျောင်ꩻတဲ့ သေနာႏတောဝ်း မာꩻသော့ꩻစွဉ်ႏစခန်ꩻ ဒုံသားတဖြာꩻဒေါ့ꩻနယ်လွဉ်နုဲင်းနဝ်ꩻသွူ

ကရင်နီအမျိုးသားကာကွယ်ရေးတပ်(KNDF) အယားသားစွိꩻယိုနောဝ်ꩻ မတ်လာ (၁၁)နီꩻနဝ်ꩻ မာꩻသီလွေꩻထိုꩻ ဗွေႏဆရာႏတောႏကျောင်ꩻနန်းနိမ်ႏတွမ်ႏ ဗွေႏစင်ꩻနီပါꩻ၊ တွမ်ႏဒုံသားဖုံႏ အဖြာꩻ(၃၀)လွိအကျောင်ꩻ သꩻတကေႏနပ်တောဝ်းတဲ့ ကွပ်စွဉ်ႏတနွောင်ꩻတောဝ်းဝင်ꩻတဲင် ဖေႏဗာႏအသွုမ်ꩻအကျောင်ꩻ တွမ်ႏသꩻဆာဆာတဲင် ဒုံသားတဖြာꩻ ဒေါꩻနယ်နုဲင်းနောဝ်ꩻသွူ

ကရင်နီအမျိုးသားကာကွယ်ရေးတပ်(KNDF) အယားသားစွိꩻ အုံခိုႏသော့ꩻ အွိင်ႏလုံးပဲဉ်ကိုနောဝ်ꩻညငါႏလဲဥ်းတဲင် ဒုံသားတွမ်ႏ ပအိုဝ်ႏစွိးခွိꩻတပ်မတောႏ(PNA) နေႏတွမ်ႏလွောင်ႏဗူႏအာႏတဲင် ၂၀၂၅ ဗာႏနေင်ႏ စက်တင်ဘာ (၁၃)နီꩻ နောဝ်ꩻ တွိက်ꩻခꩻထန်ႏလꩻထိုꩻလဲဉ်း ကရင်နီအမျိုးသားကာကွယ်ရေးတပ်(KNDF)အယားသားစွိꩻအကျောင်ꩻ တညတောဝ်းအခိန်ႏ အွိင်ႏလုံးပဲဉ် ခမ်းသားမွိးဖါသီး အီႏသဲင်အုံချာလꩻသွူ ဒုံဆောင်ႏ လမ်ႏပါႏကိုအကျောင်ꩻ ပအိုဝ်ႏစွိးခွိꩻတပ်မတောႏ(PNA) သတင်ꩻတွမ်ႏလောဝ်းဟွိန်ရေꩻဌာန ထုတ်ထေသေꩻခါ လိတ်နုဲင်းနောဝ်ꩻအကျောင်ꩻ သေထွꩻဗာႏနောဝ်ꩻသွူ ။